Назад

АШУРА КҮНҮ ДЕГЕН КАНДАЙ КҮН?

Рубрика: Статьи / Автор: admin / 28.09.2017

 

Ашура күнү – Мухаррам айынын 10-күнүнө туш келген күн. Быйылкы жылы 30-сентябрга туура келет.БУЛ КҮНҮ КАНДАЙ ИБАДАТТАРДЫ АТКАРУУ КЕРЕК?Ашура күнү орозо тутуу сүннөт болуп саналат. Анткени Аллах Таала ушул күнү Муса пайгамбарды Фираун жана анын аскеринен куткарган. Ошол себептен улам Аллахка шүгүр кылуу максатында бул күнү орозо тутуу сүннөт.

АШУРА КҮНҮНҮН ОРОЗОСУ ТУУРАЛУУ ШАРИАТТА КАНДАЙ ДАЛИЛДЕР КЕЛГЕН?

Абу Катада, радыяллаху анху, риваят кылат: «Күндөрдүн биринде Пайгамбардан ﷺ Ашура күнүндөгү орозо тууралуу сурашканда, ал: «Ашура күнүндөгү орозо – өткөн жылдагы күнөөлөрдүн кечирилишине себеп болот деп үмүт кыламын»,– деп жооп берди». (Сахих Муслим, 1976)Бул хадистен Ашура күнүнүн орозосу бир жылдык күнөөлөрдүн кечирилишине себеп болоорун билебиз.

БУЛ КҮНДӨГҮ ОРОЗО КАНТИП ТУТУЛАТ?

Ашура күнүндөгү орозо 3 түрдө тутулат:
1⃣ Ашура күнү менен кошо анын алдыңкы жана кийинки күндөрү да орозо тутуу. Ошондо үч күн (29-30 сентябрь жана 1- октябрь күндөрү) катар орозо тутулат. Мына ушунусу эң толук деңгээлде тутулганы.
2⃣ Ашура күнү менен анын алдыңкы күнү ( 29-30 сентябрь күндөрү) орозо тутуу же Ашура күнү менен андан кийинки күнү ( 30-сентябрь жана 1-октябрь күндөрү) орозо тутуу.
3⃣ Ашура күнү эле (30-сентябрь күнү) орозо тутуу. Мына ушул үч түрдүн бирөөсүнө туура келгендей орозо тутсаңыз, Ашура күнүндөгү орозону туура туткан болосуз.

БУЛ КҮНДҮН АРТЫКЧЫЛЫКТАРЫ КАНДАЙ?

– Пайгамбарыбыздын Сүннөтүн аткарып, Ашуранын орозосун тутуу мустахаб болуп эсептелет;– Бул күнү Пайгамбар да, сахабалар да жана Муса пайгамбар да Аллахка шүгүр келтирүү максатында орозо тутушкан;
– Бул күн байыркы замандан бери өзгөчөлөнүп келген улуу күн;
– Ашура күнү менен кошо анын алдыңкы же кийинки күнү орозо тутуу сүннөт. Анткени жөөттөр Ашура күнү гана орозо тутушкан. Пайгамбарыбыз аларга каршы болуу максатыңда анын алдыңкы күнун же кийинки күнүн кошуп туткан.
– Бул хадистен жыл эсеби эзелтен айдын жаңырышына карата эсептелгенин билебиз. Анткени Аллахтын Элчиси ﷺ айткан хадисте Мухаррамдын 10-күнү Фираунду аскери менен кошо жок кылган деп келген. Мусулман бир тууган! Бул күн дагы Аллах Тааланын бизге берген улуу күндөрүнөн. Кимде-ким Ашура орозосун тутса, анда өткөн жылдагы күнөөлөрүнүн кечирилишине себеп болот деп жогоруда айтылды. Мына ошондуктан бул күндөгү орозону сөзсүз карма.

Анткени Аллах Таала айткандай: «Чындыгында, жакшы иш-аракеттер күнөөлөрдү кетирет». Худ сүрөөсү (11:14)

Аллах Таалам Ашура күнүндөгү орозону тутууну баарыбызга насип этсин жана туткан орозобузду өткөн жылдагы күнөөлөрүбүздүн кечирилүүсүнө себеп кылсын.Аамин.